DESCRIPTION:
Den huki bon lugá

Den huki einan bo kier a haña mi
Di tur manera bo a lur i opservá
te ora ba haña e entreda pa bo por a ataká mi
Lamentabel pa bo ta ku bo no a kalkulá
ki ta pasa ora bo hinka un sòldá kant'i muraya

Bo no a spera ku esaki mes lo ta fin di bo kareda
fin di bo arte mayanan barata
paso den e huki kant'i muraya einan ami ta haña mi chèns ku bo
Einan mi ta dependé kompletamente riba e Dios ku ta mas fuerte i mas grandi ku bo

Einan mi ta siña buska mi refugio i studia bo bèk pa asina ataká bo
Einan mi ta haña sa ku di bèrdat mi bataya no ta kontra karni ni sanger pero kontra abo
Einan mi ta siña bringa, einan mi ta siña para, einan mi ta siña wanta te ora bo kansa
Hahaha, einan mi ta siña ta, einan mi ta siña .....

Mi tabatin dos eskoho
Unu, laga mi mente koutivámi ,
siegámi, pone mi pensa kuno tin salida
i ku mi no ta sobreviví ni un dia
òf pa mi diskubrí ken realmente mi ta,
kiko realmente mi por i pone un fin na bo insultonan féros

E promé ma laga pa e pèrdèdó
Ma lag'é pa esun mente chikí ku i ku no sa ku tin un Dios
Ma lag'é pa esun ku no tin un vishon i no ta komprondé ku e ta krea ku un propósito .
Ma lag'é p' e sòldá heridá ku ta yora i lamentá
i lubidá ku su bataya ya ta ganá
ku a lubidá ku den Dje tin un mas grandi
den dje tin un mas fuerte i ku si e entregá su karga lo ta leve

I m'a skohe
Pa kada sla ku bo por saka
mi mannan den orashon dilanti mi Tata ta krea kayo pa soportá
tur bo moketanan di rabia, konfushon i maltrato
Pa kada skòp ku bo tira mi para fuerte riba mi pia
sin tambaliá, sin entregá mi prinsipionan ku for di e beibel mi a siña

Nan ta tené mi fuerte, nan ta e baranka ku mi a establesé mi bida riba dje
Kada bes ku bo grita , kansa tur bo energia , ami ta realisá ku mi ta ketu bai na bida
Por a parse ku mi no por pero awor mi sa ku mi ta mas fuerte ku ayera

Bo mayanan barata niun sèn lo mi no paga
paso e momentu ta yega ku manera Hesus a sali for di desierto
i kuminsá su ministerio, ami lo sali for di e huki
nobo, fuerte i lo benta bo abou meskos ku bientu

Bo dianan ta kontá , bo plannan lo frakasá
I ami mas viktorioso lo mi ta
Kada bes ku bo bati mi, ta mihó mi ta komprondé
kada lèter den e palabra ku ta duna bida
Mas eksperensia mi ta haña i mas mi ta komprondé
e Dios ku a krea mi
Mas mi ta realisá ku kada rosea ku mi hala ta paso Dios a skohe mi

Ora mi pensa ku mi no por mas
i ku awor si no a sobra nada mas den mi pa bringa
E ora ei mi fe ta bira mas grandi
e ora ei mi ta siña lèn riba Esun kual ku Su sanger a kumpra mi

Pues satanas bo kareda a kaba
Bo plan ya a frakasá
Bo number ta bai hunga
Basta bo kansa bo energia
Paso sòldá ta keda sòldá, den fiesta , den guera
riba kaya i sí, asta den kueba

Sòldá sa ku e por pusha e muraya i subi bo i benta bo abou
Sòldá sa kon fiha te ora e haña e salida
Sòldá no ta bringa sin strategia i strategia di e sòldá aki ta bini djariba

Pues den huki bo kier a haña mi
Nèt bon lugá
Nèt bon lugá pa mi kaba ku tur loke ta dreprimí mi
Bon lugá pa mi deskubrí ken Dios a hasi mi i sa ku E ta ku mi
Bon lugá pa mi siña para i sa ku mi por tur kos den Kristu ku ta na mi fortalesa
Bon lugá pa mi eksperensiá benefisio di kere den e palabra
Bon lugá pa mi kaba ku bo

Bon lugá

Shelomi - ShellyB