DESCRIPTION:
U 173
Voce:A.Ciosi Parole é Musica:Ghjuvan Paulu Poletti

Sentu dì chi ci hè qualcosa,piattu cum'è un secretu
Oghje in caserna di Bastia si rende onore discretu
Ùn si sente nunda in carrughju,
U vechju pienghje in u caffé
Li vene qualchi ricordu,u Centu Settanta Trè

Eramu in li tempi negri di e più feroce battaglie
Quantu funu i giuvanotti à cascà sotte e mitraglie
Paisani o citadini,Orsu,Carlu o Dumé
Sott'à a listessa bandera di u Centu Settanta Trè

Aiò zitelli hè più ché ora a libertà si ne spenghje
Ùn sintite i mughji fora,
C'hè più d'una mamma chì pienghje
Ùn hè più tempu di dorme ma quellu di fassi valè
Noi figlioli di Cirnu,di u Centu Settanta Trè

O Signore s'è tù i vedi,quassù in lu to paradisu
Ùn hè mai troppu tardi pé rende qualchì surrisu
A l'eroi di a nostra terra,Orsu,Carlu è Dumé
Issi zitelli morti in guerra,Centu Settanta Trè

Ognunu s'hè scappillatu è po anu fattu un discorsu
U più cortu chì si sia fattu,mancu una parolla in corsu
Mute eranu e vechje trombe,andati Carulu é Dumè
Ver di e silenziose tombe di u Centu Settanta Tré

S'anu falatu a bandera,a s'anu piegata in tré
Un suldatu a s'hà purtata,cumu pudia sapé
Chì in celu pienghjendu l'ombre di u Centu Settanta Tré.