DESCRIPTION:
Autores: Teodoro S. Mongelós - Toledo Núñez.
*Audio proveído por Daniel Torales.
"Mamógui piko ahendu piririta ne ñe'ẽ.
Naimo'avéima vaekue ko'arupi rojuhu.
Ko che ñe'ã reikutu ha vokoi upe guive
techaga'u yma guare che ãngakuape ipyahu.

Che resa resa rei pe korapyre ajere.
Ape ha pépe ama'ẽ hi'ãgui rohechami.
Mamómate avei reju ko asajepyte
che mbyesay haguãite reñe'ẽ asyetei.

Pe kokuerei ku yma kurupícha asajekue
che pytu opahapeve ajeitymi romuña.
Ha agã aju che tuja mombyrýma okágui aime
ha ambyasy ahejahágue ka'aguy ha ñu porã.

Oimévapo ku oikove ako che tupãsymi
kuña koygua piretĩ che akã vaimi hague.
Añeipane ha'e cherehe na imandu'ai,
añeipa oime hesarai rojohayhueterõ guare.

Py'avai ha ñana uperõmi ndaikuaái,
ha okaraygua naimo'ãi tesaraípe oikóvaha.
Ko'agãguaro ahecha ha upéicha rupi heñoi
che küre ko purahei maymáva ohendu haguã.

Hípa upe ndajaykuái kokue, kuarahy ha ama
ha okaraygua rembiasa hipa upe ndajahechái.
Hi'ãnteko asapukái che ahy'o oipykauteve
chokokue reko asykue jaerô ndaja'epai".