DESCRIPTION:
إهداء إلى أمي الغالية وإلى جميع الأمهات في العالم (كُـلِ عَـأَمْ وَامِّــهَاتِ الْعَــالْمَ بِـأَلْفَ خَيْـــــــرَ)


ممنون الك يا يما على كل الي ساويتلي اياتو بقدر لقلقك وتعبك وسهرك راح اضلني متذكر وقد ما زيد بكلماتي مش راح هقدر اعبر بس من قلبي طالعه كلمت متشكر

(مــحــمـــود شـلـبـي)
من يومت لما كنت ولد صغير وانتي تعتني فيي وتحطي كل الي عندك وكيف سهرتي ليالي ونيمتيني بين حضنك وكيف دفتيني واعطيتني كل حبك وكيف كل هالسنين كبرتيني بقربك بتشكرك يا يما على كل تعبك وجهدك على كل الي ساوتي على كل الي اعطيتي على كل الحب الي كل يوم كنتي تزودي بصراحه انا مش عارف بئاي طريقه بدي اعوضك على تربايتك وهتمامك الي بكل هالعمر على تأسيسك الي كيف خليتني اكون زلمي قد حالي بس بتئامل انك تكوني علي راضي لائنو رضاكي علي بنسبي الي كتير غالي وبوعدك انو تعبك وسهرك مش راح يروح عالفاضي على كل الي ساوتي على كل العملتي ممنون انا متشكر عنجد انا بقدر.

(الــلازمـة)
ممنون الك يا يما على كل الي ساويتلي اياتو بقدر لقلقك وتعبك وسهرك راح اضلني متذكر وقد ما ازيد بكلماتي مش راح هقدر اعبر بس من قلبي طالعه كلمة متشكر.

(ريـتـشـارد سـافــو)
بتتذكري كيف قبل عشرين سنه ببطنك حملتيني كان في عتمي مش شايف اشي بس انتي حمتيني لما كنت اعطش من المي كنتي تسقيني وترويني لما بجوع من الخبز كنتي تطعميني وتشبعيني بعد اكم من شهر من بطنك طلعتيني شوي شوي صرت اكبر وانتي صرتي تعلميني ا...ب..ت..ث لحديت ما صرت احكي وانتي حدي متذكري لما ناديتك باسمك يايما انا بشكرك على كل اشي ساوتيلي اياتو على حبك و حنانك يا يما الله يحلي ايامك ويخليكي واقفه على اجريكي ولفرحه على وجك واجت الفرصه انو هقلك انو انا بحبك انا مش ناسيلك كل تعبك انتي يا يما مفشي زييك كمان اعطيتني كل اشي مع انو نحرمتي منو بصغرك بدي اياكي تقبلي هالغناي هديه مني لائلك يا احلي ام بالدنيا انا متشكر يا يما.

(الــلازمــة)
ممنون الك يا يما على كل الي ساويتلي اياتو بقدر لقلقك وتعبك وسهرك راح اضلني متذكر وقد ما زيد بكلماتي مش راح هقدر اعبر بس من قلبي طالعه كلمت متشكر.

(وســيــم عــكــر)
بتتذكري يا يما اول كلمه حلوي طلعت من تمي وراح تضالا تطلع لاخر يوم من عمري يا امي لاني ماليش حدا غيرك يساعدني لانسى همي وهمي انو تكوني راضي عني يا امي بفديكي بدمي وطول ما انتي بتدعيلي لأوصل لالي بدي اياه راح اوصل كمان وكمان وبوعدك معروفك مش راح انسى ولا راح اسمع شو مبقولو الناس تاسمع انك مبسوطه وبس خليني بقلبك الحساس يلي عندي اغلي من الماس متخفيش يما علي انا راح اضلني واقف على اجراي واحميكي واضلني معك لنهاي حتى لو تطلبي مني عيناي شو ما بحكي وقد ما احكي مش راح يكفي يا امي لاعوض التعب الي تعبتي علي بس بدي هقلك اني انا بوعدك يا يما مش راح اخيبلك املك وقلقك وسهرك وتعبك مش راح يروحوا فيي خساره وراح تضلك رافعه راسك فيي طول زمنك والله يعطيكي العمر كلو يا امي يا احلى زهــــره.

(الــلازمــه)
ممنون الك يا يما على كل الي ساويتلي اياتو بقدر لقلقك وتعبك وسهرك راح اضلني متذكر وقد ما زيد بكلماتي مش راح هقدر اعبر بس من قلبي طالعه كلمة متشكر.

غناء : إم دبـلـيـو أر (محمود شلبي - وسيم عكر - ريتشارد سافو)

التسجيل والانتاج الموسيقى : تشارلي شعبي (Dj Chuck)

إشراف عام : Mik Eraif