DESCRIPTION:
B.Sc student Lamminlal Vaiphei in 'Hydraulic Robot Arm' bawlkhia


Lamka, April-19: Lamminlal Vaiphei (20) s/o Haothianlun & Ms. Lamneilhing of Pengjang village, CCpur district in 'Hydraulic Robot Arm' bawlkhia a, Class-XI (Science) Physics subject a 'Pascal Law' nuaia 'Hydraulic Lift & Hydraulic Brake' azil tungtawn a bawlkhia hi'n gen hi. Aman tulelin Imphal a DM College of Science ah B.Sc 1st Semester zil hi.

Lamminlal Vaiphei in a thil bawlkhiak Robot taktak bangin gamtang thei a, JCB leh van-gik dopna(Crane) tawh a apaidan(function) kineh mahmah hi. Aman a gendanin kum 2011 in VK Tawna College ah Class-XI zil a, Physics teacher Sir Thangmuanlal s/o (late) Dr. Goukhanthang in hoihtak a 'Pascal Law' a sinsak ziakin theory a azil pen practical a bawlkhia hi'n gen hi. Class-XI a zillai in tuabang thil experiment dana bawlkhe dingin theihna leh siamna(knowledge) nei nailou a, Class-XII azil sung in hoihtakin suichian a, practical in khatvei bawlkhe masa hi. Huaipen a teacher uh hilh a, huchi'n College ah student dangte kianga hilhchian dinga sap in om a, Class-XI(Science) student -te lakah aman hilhchian(demonstrate) hi'n gen a, huaizawh in College apan thupiak om bangin student dangte' et dingin College office ah koih in om hi.

College a a zilkhiakte tungtawn in baihlam taka bawlkhiak theih hilou ahihdan genkawm in, paper ah a paidan dingte gelh masa a, paper a a gelh pen practical a bawlna dingin tamveitak try a, abawl dek tengin thumna nei masa in lunglut taka bawlzel hi'n gen hi. Kha 1 vel a buaipih nungin akhatveina dingin bawlkhe thei a, abawl masakpen khuam(stand) dingin gua(bamboo) zang a , akingakna(bottom) dingin Lamp plate zang hi.
Huainung February 2014 vel apan 'Hydraulic Robot Arm' bawlkhiak sawm in kisa nawn a, kha 3 vel a buaipih nungin tunai chin in zousiang hi. Huai Robot Arm ahihleh Multi-Function hi a, a gamtat theihna Degree of Freedom(DOF) mun 3 ah om a, tua munte ah Robot in a khut tangsak(move)in hihsau thei a, gamtatna in zang thei hi. Cylinder dingin syringe bawm zang a, piston dingin syringe kapna, cylinder khat apan adang zopsawnna dingin syringe gui zang in Hydraulic Liquid dingin tui(water) zang hi. Robot vanzat(part) dingin sing(wood) zang a, robot pumpi(body) Joint Connector leh mechanical arm banah design tengteng aman a ngaihtuah khiak hi a, Meghalaya a Class-VI a zilsung in Science tawh kisai a District Level leh Block Level a 1st prize-te alak tungtawn in Science ah lunglutna liantak nei hi'n gen hi.
Eilak ah student lama siamna sangpipi nei tam mahleh amaute adia hunhoih(opportunity) tamlou in kitaitehna leng tamlou a, tua ziakin siamna a neihte uh taklatna ding hun lemtang neilou uh hi'n gen a, siamsinna lam ah student-te'n maban hoihzaw a neihna ding un thuneitute'n kidemna chi tuamtuam leh kitaitehna chituamtuam sai poimawh hi'n gen hi. Competition ziakin mite thanuam uh a, student-te' leng competitive minded uh hi'n gen hi. Class-XI a siampen hikei mahleh tupguhna a neih ziakin Hydraulic Robot Arm' bawl khethei hi'n gen a, student tamzaw in i zilte practical a sepkhiak kisawm lou in, percent sangtak a zawhkhiak nung inleng theihna giltak tawh ki-omlou chi hi.

Christian hihna ah mahni mimal adia lamzanna dingin Pathian phawk a, student-te'n leng kuhkalna leh theihna hoihtak tawh laizil a poimawhdan gen hi.

~Manipur Express | April 20, 2014 (2nd Headlines)

link: