DESCRIPTION:
Miedu ku radionan lo boikòtiá su CD a pone ku e ta but'é riba Youtube!

For di novèmber aña pasá te ku yanuari 2011 e tabata riba nos dushi isla Kòrsou. E ta konta nos kiko e biaha akí a impreshon'é asina tantu, te pon'é skirbi algu ku ta pone hende sigui pensa manera sa ta kustumber di su komposishonnan chistoso. Ta trata akí di e kono sido artista, músiko, kompositor, produktor i doño di e kompania 'Chispi records' stablesé na Hulanda, Edsel "Payo" Juliet.
Segun Edsel "Payo" Juliet: "Laga mi bisa na promé lugá ku mi ta bon ku tur radio emisora riba tur isla di abla papiamentu. Sigur sigur ku tur lokutor i tur d.j. na Kòrsou. No ta manera na Oropa kaminda, komo artista i kompositor, bo por ekspresá bo idea i bo talentonan di e forma ku bo ke. Na Kòrsou semper tin algu ku nos mester tene kuenta kun'é. Esei ta pone ku un artista tin ku wanta su brek òf keda sin saka su produkshon, den e kaso aki un CD."
Payo ta sigui konta nos kon aña pasá novèmber el a pasa bèrgwensa na vários snèk i rèstorant chines na Kòrsou. "Tantu mucha i hóbennan komo adultonan no konosé e palabra mener òf señora ora ta komuniká ku un persona ku wowo chines. E chines por ta ta papia papiamentu mihó ku nan mes! Pero tòg nan ta yam'é Chino. Mi no por komprondé di kon e yu di teranan akí no tin e rèspèt pa e chinesnan akí. Nan no ta mésun hende kun'é? Por ta nan tin basta tempu i te asta promé kun'é ta biba kaba na Kòrsou."
Edsel Juliet ta puntra unda kos a bai robes? Den nos edukashon na kas? Ta kuantu kos pa puntra e chines ku ta yuda bo na snèk, rèstorant òf dry-cleaning kon su nòmber ta i pa yam'é na su nòmber? Of sikiera ora papia kun'é yam'é mener òf señora? Awor pa pone nos keda kòrda e asuntu akí pa semper, Payo a skirbi un kantika na papiamentu ku ta trata di un chines. Payo a duna e chines akí un nòmber ku hamas i nunka e pueblo di nos dushi isla Kòrsou lo lubidá! Komo ku e kansion akí ta un tiki inkomfortabel pa sierto skuchadó, Payo ta kere ku doñonan di radio-emisora lo no bai tok'é. Segun Payo: "Mi ta respetá nan desishon di no tok'é. Pero ami sí ta sigui krea mi fantasianan i hunga ku palabranan di nos dushi idioma papiamentu." I manera semper tras di kada komposishon ku Payo skirbi, e tin un mensahe, esta: "Esun ku ta kla pa skuch'é, lo skuch'é". For di mañan tur radio-emisora lo haña e produkshon akí i for di mañan tambe por baha e CD aki gratis for di www.edseljuliet.com. Tambe por skuch'é riba Youtube.
Elaborando riba su gira di fin di aña pasá Edsel ta bisa: "E tabata hopi eksitoso prinsipalmente pa e manera ku e hit Bo tabata sa ku mi ta kasá a dal pega. Loke ta hasi mi hopi kontentu ta ku te ainda e ta zona na radio, méskos ku e videoclip ku ta pasa na Tele Kòrsou i TV 11. Loke ta duna mi ainda mas satisfakshon ta ku ta ami mes a dirigí i a produsié, i ta ami mes a aktua aden." Ke men ku Kòrsou kier a mira "Payo" un biaha mas. Nos a puntra Edsel Juliet kiko ta e plannan ku Selma? El a informá nos ku un kompania di telefòn i internèt a aserk'é pa graba algun spòt di televishon pa nan produkto. Dia 26 di mart te ku 20 di aprel e ta na Kòrsou atrobe ku la BANDA LOCA. Manera kustumber e tin vários toká huntu ku su artistanan di Kòrsou invitá. Tur hende ku ke keda na altura di e agènda di e próksimo gira di Edsel "Payo" Juliet na Kòrsou ta invitá pa bira amigu di Edsel Juliet riba Facebook.