DESCRIPTION:
FM Belfast og Prinspóló gefa í dag út lagið Partíþokan. Lagið kom upprunalega út á safnskífunni Hitaveitan í hitteðfyrra í flutningi Prinspóló og Skakkamanage. En nú hafa Árni Rúnar Hlöðversson úr FM Belfast og Svavar Pétur Eysteinsson, Prinspóló, blásið nýju lífi í lagið í tilefni þess að um næstu helgi verður farin tónleikaferð nokkurra hljómsveita norður á Akureyri. Hljómleikarnir bera sama heiti og lagið og fara fram á Græna Hattinum laugardaginn 22. október. Auk Prinspóló og FM Belfast munu hljómsveitirnar Borko og Sin Fang stíga á stokk. Það verður því hnausþykk og löðrandi stemming fyrir norðan um næstu helgi. Sjáumst í þokunni!