DESCRIPTION:
"Un giorno un mio amico, Stanislao Palmieri, mi proponeva di rifare la canzone popolare dedicata a San Francesco di Paola in chiave più moderna... ripensando a questo episodio ho scritto questa canzone"

testo e musiche Giuseppe De Luca

Ciccillu meu

Sa' Franciscu meu di Paola, meu dilettu
Scinniti i ru timpunu ca v'aspettu
Sugnu piccatrici vi l'ammettu
Ma Santi e Gèsu Cristi li rispettu
Vi pregu 'ncinocchiata e cu d'affettu
Ca si mi fa na grazza po m'assettu
Ca nu duluri tegnu dintr'u pettu
Mo vi cuntu bonu tutt'u fattu

Sa' Franciscu meu di Paola, meu dilettu
Ciccilluzzu meu è ancora shchettu
Ca tegnu lu curredu e paru u lettu
E si si shpusa li facimi l'acrettu
È da classa i ru Settantottu
Ma a matina l'è di fari ancora u lattu
Ca capiscia sulu di tressette
E tutt'u jornu u passa dintra u lettu

Sa' Franciscu meu di Paola, meu dilettu
Vui ca sapiti puru lu dialettu
V'è purtatu puru lu quatrettu
Picculicchiu li facia lu bagnettu
Po cchiu ranniceddru pi dispettu
A 'mpizzatu focu aru gattu
Ca dopu na menz'ura pia er'è mortu
L'è acchiappatu puru cu ru vettu

Sa' Franciscu meu di Paola, meu dilettu
Ca pia puri li sordi i ru tirettu
Ara sora l'ha fricatu nu prosuttu
Ca pi u nu minari l'è protettu
Ara vecchiaia u patru è tuttu struttu
Fatiga ancora ma si via costrettu
Ca si u 'ncappa iddru pia e ru scatta
E si succeda chissu piu e mi jettu

Sa' Franciscu meu di Paola, meu dilettu
Facitilu cadiri i su traghettu
Vi pregu vi lu dicu cittu cittu
Ca vogghiu u si ricogghia nettu nettu
L'atru sterzu a shvacantata a vutta
Ca subba ca stapia mo sta sutta
Prima ca succeda ancunu luttu
C'oramai patri e figghjiu vanni 'ncutti

Sa' Franciscu meu di Paola, meu dilettu
Scinn'u capecoddru piu e l'affettu
È na vita ca unn'ammazzu nu caprettu
Mo ci manca pocu ca è n'annettu
Ca 'nta sta casa c'è sulu pitittu
I ra vrigogna u nesciu chiù 'ntu strittu
U sacciu c'aru diri para bruttu
M'aru diunu u crida l'abbuttu

Sa' Franciscu meu di Paola, meu dilettu
Scusatimi s'ancora staiu e v'apprettu
Prim'era bonu, mo è tuttu mattu
Oramai è diventatu malidittu
Si vuliti ca vu lassu puru scrittu
Ciccillu meu è tuttu nu difettu
Ca sulu vui putiti, ohi benidittu
Su lignu stortu fàtilu dirittu

Sa' Franciscu meu di Paola, meu dilettu
Pi mia siti lu Santu predilettu
Shtrincitilu cu mia nu bellu pattu
Cunzàtimi su figghiu farabuttu
Sulu vui putiti fari u ben'i tutti
Cacciàtimi su pisu, vi l'è dittu
Quannu u viditi ca è distrattu
Ara bona strata pia e ru mutti