DESCRIPTION:
Gautier de Coincy c.1177-1236. Mircales of Notre-Dame Manuscript: Entendez Tuit Ensemble.

CD : « Songs of Angels » - Songs of ecstasy by Gautier de Coincy, New London Consort, dir. Philip Pickett
http://www.medieval.org/emfaq/cds/dec60794.htm
http://www.deccaclassics.com/us/cat/4607942

Entendez tuit ensemble et li clerc et li lai
Le salu Nostre Dame, nus ne sait plus douz lai.
Plus douz lais ne puet estre qu'est Ave Maria:
Cest lai chanta li angres quant Diex se maria.

Eve a mort nous livra
Et Eve porta ve
Mais touz nous delivra
Et mist a port Ave.

Ave a qui li angres dist pie na gr[ati]a,
Dame, en toi tant de joie et tant de gr[ac]e i a
Que de toi son sacraire fist li sainz Esperiz.
Q[ui] ce ne croit sanz doute dampnez est & p[er]iz.

Ave, en ton saint ventre se dormi Dominus.
En si honeste chambre ainz mes ne dormi nus.
Celui puet tes sainz ventres porter & soustenir
Que ne puet ciel ne terre comprendre ne tenir.

Ave, Virge Marie, in mulieribus
Soies tu ben[e]oite: n'est si folz ne si bus
S'en enfer ne veut s'ame glacier & esluer
Jour & nuit ne te doie a genoulz saluer.

Ave, roys est des angres fructus ventris tui,
Giu ne le veulent croire, quar fussent il brui.
De l'espine ist la rose & la fleur de la ronce,
Veoir rn[o]lt bien devraient li murtrier larron ce.

Ave, Virge Marie, des le tens Pharaon
Fus tu prefiguree par la verge Aaron.
Li douz fruis de ton ventre bien nous senefia
La verge sanz racine qui si fructefia.

Ave, Virge: Ysaies bien te p[ro]phetiza,
Daniel, Jeremies, chascun t'autoriza,
Assez, Dame, annoncierent toi & ta nacion
Mil anz encore et plus ains l'incarnacion.

Ave, douce rousee vint des cieus & d'amont,
Lait & miel decoururent li haut tertre [et li] mont
Quant tes saintes mameles aleta Jhesucriz.
[G]iu ne verront goute ainz venra Antecriz.

Ave, quant tant t'anoncent, tuit s[u]nt d'ire acore
[Giu] que terre engloute com Dathan et Core.
Tant les het mes courages, ja ne le puis noier,
S'ere roys, les feroie touz enz un puis noier.

Ave, se tu ne fusses, touz li mons fust dampnez,
Mais Diex t'eut pourveüe ainz que fust Adanz nez
Pour saner la grief plaie dont Eve nous navra.
Qui ne t'ai[m]me & honneure ja l'amor Dieu n'avra.

Ave, pucele piue, pigment enpigmente,
Sunt tuit cil qui te servent & aiment pigmente.
Pucele enpigmentee, tu flaires plus pigment
A cinc cens mile doubles de basme & de pigment.

A la Virge Marie prions tuit de cuer fin
Qu'avec celui nous face vivre & durer sanz fin
Qui por nous donner vie en la croiz devia.
Sa chanson ci finee li prieurs de Vi a.