Carmina Burana 131a Philippus Cancellarius (ca. 1170 - 1236)
Bulla fulminante sub judice tonante, reo appellante, sententia gravante Veritas supprimitur, distrahitur et venditur Justitia prostante; itur et recurritur ad Curiam, nec ante quid consequitur, quam exuitur quadrante.
2. Pape janitores Cerbero surdiores. in spe vana plores, nam etiamsi fores Orphëus, quem audiit Pluto deus Tartareus, non ideo perores, malleus argenteus ni feriat ad fores, ubi Protëus variat mille colores.
3. Si queris prebendas, vitam frustra commendas; mores non pretendas, ne judicem offendas! frustra tuis litteris inniteris; moraberis per plurimas kalendas – tandem exspectaveris a ceteris ferendas, paris ponderis pretio nisi contendas.
4. Jupiter, dum orat Danen, frustra laborat; sed eam deflorat, auro dum se colorat: auro nil potentius, nil gratius, nec Tullius facundius perorat. sed hos urit acrius, quos amplius honorat; nichil justius, calidum Crassus dum vorat!